ଜିଲାରେ ଆଇନ ଶୃଙ୍ଖଳା ପରିସ୍ଥିତି ବିପର୍ଯ୍ୟସ୍ଥ

ବୌଦ୍ଧ: ଜିଲାରେ ଆଇନ ଶୃଙ୍ଖଳା ବ୍ୟବସ୍ଥା ଭୁଷିଡିବାରେ ଲାଗିଛି । ବେଆଇନ ଗଂଜେଇ ଚାଷ ସହିତ ଜିଲାରେ ଅପରାଧିକ କାର୍ଯ୍ୟକଳାପ ମଧ୍ୟ ଦ୍ରୁତ ଗତିରେ ବୃଦ୍ଧି ପାଇବାରେ ଲାଗିଛି । ନିଶା କାରବାର ବୃଦ୍ଧି ପାଇବା ସହ ଚୋରୀ,ଡକାୟତି,ଲୁଟ ଭଳି ଘଟଣା ଜିଲାବାସୀଙ୍କ ପାଇଁ ଅସୁରକ୍ଷିତ ପରିସ୍ଥିତି ସୃଷ୍ଟି କରିବାରେ ଲାଗିଛି । ସପ୍ତାହକ ମଧ୍ୟରେ ଜିଲାରେ ଗୋଟିଏ ହତ୍ୟାକାଣ୍ଡ ସହିତ ଦୁଇ ଦୁଇଟି ବଳାତ୍କାର ଘଟଣା ଜିଲାର ବୁଦ୍ଧଜିବୀ ମହଲରେ ଉଦବେଗ ସୃଷ୍ଟି କରିଛି । ପୁଲିସ ସୁତ୍ରରୁ ମିଳିଥିବା ସୂଚନା ମୁତାବକ ତିନିଦିନ ତଳେ ବୌଦ୍ଧଥାନା କଉଡିଆତୋଳା ଗ୍ରାମରେ ଘଟିଥିବା ଯୋଜନାବଦ୍ଧ(ଟ୍ରାକ୍ଟର ମଡାଇ) ହତ୍ୟାକାଣ୍ଡର ଅଭିଯୁକ୍ତମାନଙ୍କୁ ଗିରଫ କରାଯାଇଛି । ଦୁଇଦିନ ତଳେ ବଘିଆପଡା ଫାଣ୍ଡି ଅନ୍ତର୍ଗତ ବିରିଗଡ ଗ୍ରାମରେ ଜଣେ ନାବାଳିକା ତାର ସଂପର୍କିୟଙ୍କ ଦ୍ୱାରା ବଳତ୍କାର ଶିକାର ହୋଇଥିବାବେଳେ ଅଭିଯୁକ୍ତକୁ ଅଟକ ରଖି ପୁଲିସ ପକ୍ଷରୁ ଘଟଣାର ତଦନ୍ତ ଚାଲୁ ରହିଛି । ସେହିପରି ବୌଦ୍ଧ ଥାନା ବନ୍ଧାପଥର ଗ୍ରାମର ଜଣେ ମହିଳାଙ୍କୁ ବଲାତ୍କାର ହୋଇଥିବା ନେଇ ବୌଦ୍ଧ ଥାନାରେ ଅଭିଯୋଗ ହୋଇଥିବାବେଳେ ବର୍ତ୍ତମାନ ମହିଳା ଜଣକ ବୌଦ୍ଧ ମେଡିକାଲରେ ଚିକିତ୍ସିତ ହେଉଥିବା ଜଣାପଡିଛି । ଏହି ବଳତ୍କାର ଘଟଣାକୁ ଶାସକଦଳର କର୍ମୀଙ୍କ ସହ ଯୋଡି ସାମାଜିକ ଗଣମାଧ୍ୟମରେ ରାଜନୈତିକ ରୂପ ଦିଆଯାଉଥିବାବେଳେ ପୁଲିସ ପକ୍ଷରୁ ଏହାକୁ ଖଣ୍ଡନ କରାଯାଇଛି । ପୁଲିସ ସୁତ୍ରରୁ ମିଳିଥିବା ସୁଚନା ମୁତାବକ ବନ୍ଧାପଥର ଗ୍ରାମର ମହିଳା ଜଣକ ଗତ ୧୭ ତାରିଖ ରାତିରେ ପରିସ୍ରା ପାଇଁ ଘରର ବାଡିପଟକୁ ଯାଇଥିବାବେଳେ ଅଭିଯୁକ୍ତ ଜଣକ ତାଙ୍କ ମୁଣ୍ଡରେ ଆଘାତ କରିଥିଲେ । ସେହି ଆଘାତ ଫଳରେ ମହିଳା ଜଣକ ଅଚେତ ହୋଇଯିବାପରେ ଅଭିଯୁକ୍ତ ତାଙ୍କ ସହ ବଲାତ୍କାର କରିଥିବା ନେଇ ଗତ ୧୯ ତାରିଖରେ ବୌଦ୍ଧ ଥାନାରେ ଅଭିଯୋଗ କରିଛନ୍ତି । ମହିଳାଙ୍କ ଲିଖିତ ଅଭିଯୋଗ ଆଧାରେ ବୌଦ୍ଧ ପୋଲିସ ଥାନା କେସ ନମ୍ବର ୩୨/୨୬ରେ ଦୁଷ୍କର୍ମ ମାମଲା ରୁଜୁ କରିଥିବା ଜଣାପଡିଛି । ତେବେ ପ୍ରତିଦିନ ଜିଲାରେ ଏହି ଭଳି ବଡ ବଡ ଅପରାଧିକ ଘଟଣା ଜିଲାର ଆଇନ ଶୃଙ୍ଖଳା ପରିସ୍ଥିତିକୁ ନେଇ ସାଧାରଣରେ ଆଲୋଚନା ହେଉଅଛି ।